美國昨晚公布的通脹數字高過市場預期， 美股原先按劇本大跌，但好快收復失地不特止，道指收市仲大升828點(幾好意頭😄)，幅度達2.8%，標普指數升93點或2.6%。大家都摸不着頭腦，何解美股升咁多？ 是否轉勢有望？
星期四公佈的美國9月通脹數字，按月升0.4%，高過市場預計的0.3%，是1980年代初期以來的最高水平。唔計食品與能源價格的核心通脹，升0.6%，亦高過市場預期，回到40多年來的最高水平。
連跌多日的美股，見到這個數字，一開市自然再跌多下。誰知好快來個大翻身，全日的走勢好似過山車，先急插後飆升，一日之內高低位點的數波幅多達1507點。
何解美股升咁多？
一朝起來，筆者見到美股升咁多都唔太相信，連美國及外國媒體都話 “匪夷所思”。點解通脹熱到爆，但股市表現出乎意料之外？咁神奇的表現都值得趁下熱鬧討論下。
何解美股升咁多？
- 市場早已偷步消化咗壞消息，另外，有心人早早部署來一個大反攻。不要忙記，美股在公布通脹數字前都瀉咗好幾日，唔使等到數據出先做反應。
- 美國企業公布的業績依然理想。目前正處於業績公布期，近日公布的公司業績，都有唔錯表現，例如百事可樂PepsiCo (PEP)不單數字好過預期，管理層調高對前景的睇法。反映前景都唔係一面倒咁暗淡，有助支撐大市的表現。
- 通脹升得多，有人覺得離到頂不遠，所以態度出現大逆轉。
- 股市連跌多日再大插，出現技術反彈，以及引發一些沽空盤獲利情況。
圖：標普指數5年走勢
事實上，股市調整多時，通脹升溫、加息步伐加快，以外外圍的地緣政局緊張，令到股市大幅波動，成為低沉咗好耐的對沖基金，有大顯身手的機會。股市雖然來一個大反彈，但問題仍在，投資都要繼續審慎好啲。
(14/10/2022)