地緣政局進一步緊張，嚇得港股跟外圍大瀉，跌超過800點🥵，大部份藍籌股跌到四腳朝天，唯獨是李嘉誠旗下幾間公司，表現穩如泰山。唔講可能大家未留意，近期李嘉誠的動作多多，同時，旗下的公司股價都跑贏大市。
圖片來源：公司網站
年初至今，港股跌了一成，而長和系 旗下的集團則逆市上升， 近一年來有不錯的表現，扭轉了多年來的弱勢，而李嘉誠及旗下的集團也不斷增持及回購股份。
圖：長和系集團股價表現（截至7/3/2022）
跟李嘉誠投資一向都需要耐性， 很多小散戶來說，都是知易行難，並唔容易。每當外圍經濟弱，佢地四周尋找投資機會，隨著歐洲經濟開始有起色，佢地嘅投資似乎走入收成期，最近打算賣出了歐洲的電訊和電力業務，回報可謂相當唔錯。難怪今年股市弱，地緣政局緊張， 李嘉誠旗下幾間公司股價逆流而上。
長和(0001)早前宣布， 獲得英國監管部門開綠燈，出售英國的電訊發射塔資產，作價為約37億歐羅（折合324億港元）。與此同時，長和系的集團亦洽售由長實 （01113） 、長建 （01038） 及電能實業 （00006） 所共同持有的英國配電業務UK Power Networks。
隨著歐洲經濟開始回復正軌，美國的加息有機會步伐加快，此時賣咗一啲資產，增持多啲現金，減少借錢都是合理不過的做法。
事實上早幾年歐洲及英國經濟停滯不前，又有英國脫歐問題困擾，主要市場在歐洲的長和系多個集團，即使派息吸引，股價都乏善可陳。不過集團就好積極在各地進行收購，長建買下買下唔多夠錢，就搵埋長實及電能一齊入市。原本集團重組分工分明，但買下買下架構又混作一團，連長實地產都要改番名叫長實集團(01113)。
倘若蘇聯入侵烏克蘭引發的地緣政局緊張局勢能緩和下來，加上歐洲經濟復甦步伐加快，長和系集團其實擁有不少歐洲的資產，可以出售的應該還有不少，未來日子應該都有唔錯的收成。不過要留意的是歐洲政局日日新鮮，通脹升溫和疫情的變化會否窒礙歐洲的經濟復甦，都是一些不明朗的因素，投資時要多加留意。
(8/3/2022)