近期市場的焦點聚焦在滙豐銀行(0005) ，其實中資銀行股唔好得好多，四大國有銀行包括工行 （01398） 、建行 （00939）、中行 （03988） 、農行 （01288），近期都創過五年新低。經濟環境不利銀行股，派高息都補唔番，更何況派息有機會減少。
滙豐今年以來跌了54%，內銀股一樣跑輸大市。今年至今港股調整了約一成六，但內地四大國有銀行，表現最好的建行都跌兩成半。最大隻的工行縮水33.5%，派息七、八厘都補唔番。
圖： 內銀股今年以來表現(截至25/9/2020)
羅兵咸永日前發表《中國銀行業回顧與展望》報告，統計52間中國上市銀行上半年淨利潤為9101.5億元人民幣，按年下跌9%，是史上首次出現整體負增長😱。
經濟差、壞帳多，加上要肩負起國家任務，不可以只顧自己的利潤，即是應中央要求作「銀行讓利」，犧牲自己的利益幫手挽救經濟，咁樣股價點會唔跌😩。這也是筆者對中資股作長線投資有一定保留的原因，國家幾時出手、點出手是好難估。手上賺的錢好易又溜走咗，有機會再分享經驗。
內銀股早前公布的中期業績，資產質素，即係壞賬情況都惡化，由於內銀股都是一年先派一次息，大家預計未期息好大機會都會派少啲，但相信好似滙豐咁唔派息的機會較低，因為近年國家政策鼓勵企業多派息。
買銀行股真的要三思
滙豐跌完又跌，其中一個因素是暫停派息，可能有部份小散戶轉移去買內銀股，以為仍然有高息派，不過，大家真係要睇定先，經營環境差係普遍銀行股面對問題，不單是歐美銀行，連內地銀行股都一樣。所以在這個艱難時期，都係忍忍手。當收入減少，股價大跌，賺息蝕價都冇用。
其實銀行股這類舊經濟股在過去幾年表現唔太好，長期都跑輸大市，筆者最後一隻持有過的內銀股是建行，早於多年前都賣出去了，大家有興趣可以睇番我在2017年寫過的文章：100萬之路:跟建行說再見。