美股幾大巨頭Facebook母公司Meta Platforms(META)、蘋果(AAPL)、Amazon(AMZN)及Google母公司Alphabet(GOOGL)這兩天先後公布業績，勢令市場表現波動。細心研究其實普遍成績表唔太好。不過這篇文章想講下近排市場的焦點：ChatGPT
META出業績後股價大升，業績改善主要因為 “終於”懂得慳錢，同時承諾會睇實元宇宙這個龐大計劃的開支，加上又出殺手鐧：回購股份，市場當然受落。
蘋果公司季度收入三年半來首次下跌，主要受累於中國供應鏈中斷，推遲了聖誕這個黃金檔期iPhone的交付。
Amazon業績好過預期，但睇真啲，公司主要增長進力的雲端服務AWS增長放緩。
Alphabet業績唔太理想，網上廣告收入遠比預期差。
連串的利淡消息。科技股無可避免又會波動，等市場消化一下。
ChatGPT熱潮沒法擋
不過近期最熱烈討論的是另外一個話題：微軟(MSFT)有份投資的聊天機器人服務ChatGPT(Chat Generative Pre-trained Transformer)。ChatGPT由初創企業OpenAI建立，微軟支持。單單在2023年一月，活躍用戶由5700萬，急升至一億。
這是甚麼的數字？
抖音開始時要花了九個月時間才達到1億用戶，而對於Meta Platforms的Instagram來說，大約花了2.5年時間。 依家ChatGPT只係用咗兩個月，已增增加到近億用戶。這個服務前景有幾大可想而知
ChatGPT是甚麼？
ChatGPT是聊天機器人，我當佢係搜尋器的進化版。當大家Google一般內容的時候，就會列出眾多的連結或者相關內容，之後自己慢慢揀、慢慢搵。而這個聊天機械人，則會搵完資料，再幫你整合，用 “人話”回答你的 “要求”。
筆者早前本想打開來試，但ChatGPT由於免費、功能又多，所以網站經常人流多到down咗。未能成功開戶試用。不過，相關的AI服務我一直都有試，或者我用另一個近似的AI writer 來試比大家睇，有個基本的印象。
示範片段
我搵咗AI幫我寫文章。值得一提，AI懂多國語言，要佢寫中文都冇難度
我只是輸入13個字： “列出6個步驟如何入場買美股”
結果就如下圖，另外我又上載短片給大家參考：
圖：AI寫文章
請按文章上面的短片(片長54秒)
這個AI功能好勁，佢除咗可以幫你寫文，也可以搵你搵資料，諗唔到題目，叫做寫幾個熱門話題都得。所以ChatGPT這個免費服務一出，各大小的KOL都出片，話可以唔使自己動手，用AI幫你寫Blog post，又或者加埋自動製片的軟件，幫你出片放在YouTube賺錢。一見到咁易賺錢，點會唔吸引人去開戶。
作為用戶，我覺得唔錯，天下文章一大抄😂。不過由於內容是AI幫你搵，AI未識得核實資料，同時也有啲是陳年內容。所以好似我呢啲寫稿員，仲未感到有被淘汰的威脅😮💨。
話說回來，初創企業OpenAI剛於星期三宣布，會推出收費的加強版 ChatGPT Plus。另方面，Google也不咁示弱，話有新回應行動面對這個挑戰。結果如何大家不妨拭目以待。
(3/2/2023)