美股及港股似乎是虎頭蛇尾，2023年一開始就係威係勢，市場氣氛好似逆轉過來，港股升得更勁，跑贏了全世界咁，跟著分析員出嚟火上加油，又話睇恒生指數會上二萬四，近排大家收晒聲。
年頭的時候筆者曾寫過一篇文章 “股市真的轉好？唔好開心得太早”，提大家唔好太興奮住，因為歷史告訴我們，好多時候可能係虛火嚟，特別是港股，屢見不鮮。
我沒有水晶球，只是參照經驗，同時另一個問題係，困擾股市的因素未見太大改善，好難睇得太好。我們所能做的是趁勢，高位減啲貨，特別是港股，所以我都沽咗部份的港交所(0388)。
港股險守二萬點
港股投資要靠自己，無論是市場上的分析員，或者報紙雜誌的評論，唔睇無乜損失，一來精英部隊走去評美股，港股宜炒不宜長，基本分析及圖表分析作用不大，政策一轉，話蝕就蝕，同時本地證券行大間小小的是中資行，細間的分析可以有幾專？會否唱好不唱淡？資訊流通也是好大問題。
美股會好好多，資訊流通發達，百花齊放又比較專業，市場可預測性比港股高，這也是吸引一批資深股民的原因。
話說回來，港股在1月27日升到去接近22,700水平的高位，升幅接近一成半。之後急轉直下，依家險守二萬點關口，年頭的升幅所剩無幾，恒生指數年初至今升幅收窄至1%，跌到去20,010。
圖：港股今年以來走勢
道指率先見紅
美股方面，三大指數當中，道瓊斯指數率先由升轉跌，年初至今下跌1%。標普500指數升幅只是剩低3%，納斯達克指數好少少，仍有接近9%的升幅。
美股三大指數都代表不同類型的股份，道瓊指數代表一些傳統的股份，多是較穩健型的股份，去年跌得相對較少，而這類股份其實年初反彈幅度並不顯著。標普500指數反映各類大企業表現，整體表現平平。2023年頭至今，升幅最顯著的就是去年跌得最多的增長型股份，特別是科技股及加密貨幣相關股份，年初出現報復性反彈，其實近期高位回落得唔少。依家剩返9%的升幅，未知可以捱得幾耐。
過去一年，美國連番加息，越加越勁，市場預期捱到今年，經濟會冷卻，聯儲局可以收手。奈何經濟仍然唔差，失業率低過疫情前水平，消費信心無受影響，經濟仍有增長，大家對快將停止加息的期望似乎要落空了，近期出多一些數據，資金就借勢說再見。
事實上，聯儲局連番加息對美國經濟真的沒有影響？定影響有滯後的作用？只可以預期，今年上半年，市場都未明朗，投資的部署一係小心一點，一係趁勢，跌得 “好多”的話，趁低吸納作長線的部署。
(27/2/2023)