Deliveroo在三月最後一個交易日喺英國上市，第一日股價收市急挫26%，有人話這是英國史上最差的大型新股。這個結局當然令到很多人失望。分析失敗原因，其實反映新股上市包含咗好多意義，今次跟大家討論一下。
圖片來源：公司網站
一向以來，筆者對於新股上市，興趣只是一般的，如果公司夠大、有特色(賣點)或聲譽較好，就會襯下熱鬧，否則都會擺埋一邊，遲吓先再研究。
新股上市，其實對小股東來說，是一個博弈的遊戲。一間公司如果做得好，唔出聲都有銀行家走上門，主動想借錢俾你，點解要招股上市呢？究竟是公司想籌集更多錢大展拳腳，定係等錢洗，或者公司的發展去到高峰期，見到環境勢色唔對，要跟公眾分擔風險？
大家認購新股時，要諗一諗公司上市背後的原因，所以招股書就要望一望，特別是公司發展有什麼風險因素值得留意，這也是筆者經常提醒大家要注意的事項。不少的傳統投資基金，有明文規定不可以涉足新上市的公司，因為公司尚未有往績可尋，風險比較大。
Deliveroo新股反應差原因
Deliveroo是英國近年大型上市的新股，英國方面都寄予厚望，希望可以幫手造下勢，吸引更多新科技的公司到倫敦上市，特別是脫歐之後，英國受到歐洲特別是荷蘭阿姆斯特丹交易所的競爭威脅越來越大，要保住全球金融市場的領導地位，必須有更多高質素、新意念公司上市，可惜今次結局未如人意。
Deliveroo上市反應差，公司已經用招股價下限定價，上市第一日已經急跌，買賣並不活躍，反映股民興趣都不大，究竟是什麼原因呢？
有人歸咎於沽空股動，又話時機並不好，近月科網股已經熱潮冷卻，股價調整不少，亦都有人覺得是公司管治質素有問題，同時上市前無啦啦多了三個唔肯透露背景的基石投資者，公司採用同股不同權架構亦引起爭議。此外，公司尚未有錢賺前景未見太明朗， 在預期肺炎疫情影響減退下，大家可以走出來，毋須焗住留在家中食外賣。亦有人覺得是幫手搞上市的投資大行做得唔好。
要數的問題還多，簡單一句，時機唔好，問題便會出晒嚟。
圖：DoorDash與標普500指數近一個月股價表現
事實上，美國去年熱門的同類新股DoorDash(DASH)，投資熱情亦冷卻晒，近一個月以來，股價都跌唔少，不少分析員口風都轉晒，不斷潑冷水，覺得估值太高唔吸引。
總括一句，新股上市要多留意一下風險，特別是人家在監管機構要求下，做了一本厚厚的報告和分析(招股書)，都要望望，湊完熱鬧要仲要懂得落車。