踏入2023年港股及美股都似乎扭轉了去年的頹勢，美股標普指數升了接近4%，而港股升得仲勁，反彈接近一成，跟著大行又出來唱好港股，又話睇恒生指數上二萬四點。不過有留意近幾年港股表現，不少都係虎頭蛇尾收場，今年情況唔知會唔會一樣？🤔
圖：港股近年表現-虎頭蛇尾
港股年頭走勢好是預期，中國放寬防疫政策對外開關，兼且為撐經濟，未來或有較多利好政策推出，有利中資股低位反彈。港股近日大升主要是中資股，本地的股份特別是高息股都斯人獨憔悴。
圖：美股各類股份表現
美股方面，近日表現最好的是地產、金融、原材料股等經濟敏感度高股份，以及去年跌得多的通訊及奢侈品行業。
美國公布的通脹回落，12月消費者物價指數按年增長6.5%，低於11月的7.1%增幅，是2021年10月以來最低，數字未出早就有人偷步炒上。不過呢啲數字時好時壞，唔會支撐股市好耐，放在眼前還有不少的負面因素未消，況且今年投資的關注點，會從通脹和加息，轉移到經濟衰退。
當大家見到通脹回落，而聯儲局放慢加息步伐，甚至減息時，這代表甚麼？好大因素是經濟轉弱，或出現了滯脹(通脹高居不下、經濟呆滯)，當公司公布的業績反映這些實況時，股市又難免大起大落。
不過，如果中國重啟經濟，而經濟又逐步復甦的話，香港以致全球都會受惠，不竟14億人口的國家，經濟復常，生產慢慢恢復過來，對能源、資源及產品需求上升，世界各地經濟也會受惠，近期見到銅價都持續上升。
在利好、利淡消息夾雜下，股市自然又升又跌，但股市大升唔好開心太早，總之今年的市況影響因素多，投資繼續小心，入市唔好太急、太投入，分注行事可能唔會咁易出錯。
(13/1/2023)