美股星期一(10/1/2022)又經歷一場大波動，而股市波動，黃金理應成為資金的避難所，但現實並不如是，金價跟股市難兄難弟，似乎投資黃金比投資股市更難捉摸。
講番美股星期一的表現，早段好似食咗瀉藥，在大型科技股拖累下，納斯達克指數跌逾2%，大型半導體股如ASML(ASML)及 Nvidia (NVDA)一度跌超過半成，之後出現大反彈，納指由跌轉升。
觸發早段跌市又係因為預期快將加息及擔心政府收水， 十年期美國國庫債券價格下跌，推升了息率曾去到1.8%，是疫情肆虐以來的新高，科技股首當其衝受到拋售。納指跌咗咁多日，終於吸引一啲投資者大舉入市撈貨。
今年以來幾個交易日，美股的勢頭認真麻麻。股市弱，加密貨幣的表現亦都並不好過，比特幣的價格跌一度穿了40,000美元水平，是去年九月以來第一次。至於黃金，表現都唔理想。
市場擔心通脹，黃金理想有吸引力，傳統上唔少人相信黃金保值。市況波動，黃金又會有支持，不過，近期的金價表現話你知唔係呢回事。金價在美國時段在每盎司1800美元以下水平收市。
圖：SPY、QQQ及GLD價格表現
睇番黃金價格的表現，一直跑輸股市。以追蹤金價的黃金ETF(GLD)，以及分別追蹤標普指數及納斯達克指數的ETF，即SPY及QQQ 為例，無論是三年、五年或十年的表現，都跑輸了大市。金價表現的不濟，令到部份投資者用加密貨幣取代黃金來保值。
總括來說，今時今日投資黃金，要取得長期、穩定的回報越來越難。2022年在加息的陰霾下，美股有機會變得比較波動，打算投資黃金來避險，或以黃金來抗通脹，最好三思。