今年全世界主要地區的股市都做得唔好，強積金(MPF)表現都難期待會有奇蹟，筆者近日有時間又睇下強積金數據，又再次印證：強積金唔好好管理，10年下來可以幫你蝕大錢，所以如果閣下的MPF做得唔好，一係重整組合，或轉換強積金公司。
香港的強積金，投資表現都出晒名…差，大部份都差過大市(唔係我估，大家自己上積金局的網頁睇比較就知)。不過，我哋冇得揀唔投資，錢係辛苦賺番嚟，當然要好好管理，唔可以比人幫你蝕錢。
筆者一年多前跟大家分享， 把中國和香港基金踢出了投資組合之後，表現生猛番晒，不過2022年美國跟全世界一樣，表現都咁差勁，所以MPF組合的表現亦無可避免一樣蝕錢。 年初以來今跌咗13.2%，不過呢個整體跌幅，都些微好過恒生指數今年的表現。個人組合中跌得最多是歐洲及增長型基金，反而美洲基金跌得相對細，但仍有雙位數字。
強積金表現差距大
睇完自己的組合，又睇下整體MPF的表現，去到香港投資基金公會和積金局網頁，望望數據，又係冇眼睇🙈。大部份平均強積金表現差過大市(比較的指標)。今次又再找來一張圖，作用係再提提大家，唔好好睇實自己的MPF，不單冇錢賺，仲會幫你蝕大錢。
圖： 強積金5年及10年的投資回報 (資料來源：積金局 )
上面張圖好簡單，睇到強積金公司5年(藍色)及10年(綠色)累積的回報，值得留意的是：
- 最好和最差的基金，差距好大，特別是較為進取型的股票基金，最好的股票基金5年期賺咗68% ，10 年賺219%。最差的股票基金，5年幫你蝕咗30%😱，10年蝕咗15%😱。
- 其他類型的投資基金，如混合型、債券基金等，最好和最差的基金，差距冇咁大，但最好的有錢賺，最差的也有機會幫你賺錢🥺。
- 債券、保證基金不一定幫你保本，5年期、10年期做得最差的債券和保證基金都見紅。
- 要保本就好似放錢入銀行一樣，投資貨幣基金，特別是港元基金，賺取 “微型”的利息，但長線回報追唔上通脹，錢會縮水。
結語
強積金是要管的，長期放埋一邊， 浪費了爭取投資的時間，以及有機會蝕錢。 不要以為放在一些看似 “安全”的投資，例如保本或債券基金，就可以賺少啲安心等收成，基金收管理費的，所以做得差基金照收錢，最終一樣可以幫你蝕錢。你不理財，財不理你。
(22/8/2022)