擁有14億人口的中國，一舉一動都會牽動世界的經濟。今次大陸唔玩清零的防疫政策，要重啟經濟，有一類股份表現即時生猛番晒。
中國重啟經濟而經濟又逐步復甦的話， 對能源、資源及產品需求上升，所以近期分析員好多都睇好呢一類股份：資源股，特別係銅。
今年以來，Global X Copper Miners ETF (COPX)，上升了12%，跑贏咗大市，並且收復去年的失地，走勢比標普指數的2%升幅，以及港股恒生指數的9%升幅更強勁。COPX是一隻ETF，主要投資在銅礦商或產銅的企業。
Barron’s 雜誌及《金融時報》近日不約而同都有文章講到中國經濟邁向正常化，帶動了原材料需求，銅價近期表現越走越強。筆者又順勢趁下熱鬧。事實上，早幾日提到近期股市表現時，( 股市真的轉好？唔好開心得太早 )都略略講過下。
圖：COPX近一年走勢
近日見到一些關於COPX的分析，都少見大部份都睇得幾好。唔單止COPX，大型的銅生產商Lundin Mining (LUNMF)及Freeport-McMoRan (FCX)年初至今幾個交易日，分別升咗10%及16%。以邊際利潤及財務角度來看，兩者以LUNMF啲數據靚啲。
LUNMF為加拿大公司，在巴西、智利、葡萄牙、瑞典和美國都有採礦業務。 除了銅之外，還有生產鋅、鎳和黃金等金屬。FCX則在北美、南美洲和印尼從事礦產開採。
圖：LUNMF及FCX近一年股價走勢
中國市場之所以咁受關注，皆因這個世界工廠，一旦經濟有改善，會扯高全世界的需求，推動價格上升。 國際銅研究小組估計，2021年中國在世界銅使用量佔全球超過55%份額。
分析員相信，中國走出嚴厲的防疫政策，經濟及生產走向正常，對商品的需求唔係一下子的事，而係逐步來，預料今年下半來需求先見明顯，如果佢地冇估錯，咁銅價的升勢還會持續。但信定唔信大家自己做吓功課。
年多前筆者都有一篇介紹過銅及資源類股份的文章，有興趣可以重溫下。
👉🏻睇好綠色經濟？銅價長線無得輸🤔 (10/5/2021)
20/1/2023