近期城中熱話之一，相信包括埋呢句：你換咗英鎊未？英國新政府上任不久，即推出一個迷你預算案，大福削減稅項，導致本身已弱不禁風的英鎊，再度大跌。對於打算去讀書、旅遊或移民的朋友，可能是換錢的機會來了。不過，依家是否兌換英鎊的好時機？
信心大失 英鎊跌勢未止
英國新政府上場，即宣布半世紀以來最大規模的減稅措施，市場擔心英國通脹因而進一步升溫，財政會惡化，因而對英鎊信心盡失，拖累英鎊早前連日大瀉。
眼見市場出現震動，英國央行(英倫銀行）都要出手重啓買債，同時又暗示未來會大幅加息，此舉有助穩定債市、撐住英鎊，所以英鎊大瀉後可以略為喘定。
唔少朋友見到英鎊從低位反彈，慨嘆錯失左機會，所以又想急急入貨，但值得留意的是，英國仲有好多問題未解決，英鎊的弱勢未知幾時可以扭轉。有市場人士預測，未來有機會兌美元出現一算，即英鎊兌美元一兌一。亦即係兌港元跌到落7.8水平，現時英鎊兌港元大約在8.6左右水平，所以仲有潛力再潛水。
大家睇到英鎊咁淡不無原因：
- 市場對英鎊的信心已經盡失，近期匯市喘定，只因為央行出手穩定大局，但撐得一時，撐唔到一世。
- 英國新政府新政策，進取的財政政策，包括大幅減稅，又要扶持國民對抗高電費、高通脹，但錢從何來？這都是會令英國債台高築，貨幣想強都唔易。
- 美元走勢太強，唔止英鎊，全世界貨幣都一樣。
- 英鎊走勢弱不是今日的事，歐洲地緣局勢緊張，油價上漲、通脹升溫，加上息口上升，這都不利經濟發展。
英國按揭貸款息率上升都已經令樓價下跌。此外，英鎊大跌，息口趨升，令到部份企業借錢成本上升，而入口成本變得貴咗，這都不利營商，英國經濟問題唔會咁快解決到。
話者唔講大家未必知，英鎊兌美元在1950年代之前，曾經是1兌4， 之後慢慢的回落，今天兌美元跌到落1兌1.1水平。未來會否真的去到一算呢？拭目以待。
圖：英鎊兌美元走勢
總括來說，在強美元下，英鎊的弱勢有機會更弱，未必可以在短時間扭轉。現時市場對英鎊信心不足，可以預見滙價的波動持續，如果出現埋炒家興風作浪，咁就更加睇淡。
(11/10/2022)