在產品應用上，我是一個蘋果迷，不過投資方面，暫時對蘋果(AAPL)興趣不大，反而覺得微軟(MSFT)有賣點。
近年來微軟的業務平穩增長，發展空間大，著眼點就是天上哪舊雲☁️☁️雲端業務。美國科技巨企FAAMG中，微軟一向唔搶鏡，但其實有賣點，最近公布的季度業績亦都再次確認這點，下面慢慢解釋。
FAAMG指Facebook(fb)、Amazon(AMZN)、Apple、Microsoft 及Google。
圖片來源：公司網頁
講開又講，上個星期筆者工作效率認真差，原因就是微軟Word的軟件出問題，我花了不少時間去修正。其實個人用開Apple的Pages及 Numbers，已經比較少用Word或Excel，不過與外間公司聯繫，文件唔用Word唔得，始終都離不開微軟的軟件😂，它在商業上已經有壟斷性的地位，這也可以說是護城河。
微軟上星期公布了季度業績，表現好過預期，令到股價大幅上升。各項業務全方位都有不錯的表現，不過焦點當然就是雲上☁️的業務。公司業績公布之後，換來不少的掌聲。
肺炎疫情令到家居工作成為常態，亦都令到企業加快轉型，推動了微軟的商業雲端服務收入上升了34%，達到167億元。第二季度公司收入按年上升17%，遠好過市場預期的10%。
大家有興趣可以按此去公司網頁睇睇業績內容。
微軟雲端業務是焦點
近年微軟在雲端業務的發展令人另眼相看，此外，公司的業務分散，幾個業務核心包括：雲端業務(Office產品、Azure等)、遊戲(Xbox等)及電腦設備(Surface等電腦產品)，都有不錯的表現，當中的引擎是網上平台Azure。
圖：FAAMG公司資料
在FAAMG五大巨企股價表現當中，微軟的股價並不輸蝕，三年來增加了147%，跑得快過Amazon、Google及Facebook。過去一年受到肺炎疫情影響，商業活動受挫，但股價仍然能夠有38%的增長，已經算不錯了。
在這五隻股份中，Facbook及Google未見好吸引，同時未來歐美的監管有可會收緊，Facebook又見到網絡移民潮，所以都唔太識睇。Amazon市盈率高達90倍，如果未來增長速度減慢，好難支持這麼高的估值。至於蘋果和微軟，PE分別約36及35倍，以業務的增長和活力，似乎微軟樂觀一點，至少雲端的發展仲有好大的空間，業務增長未必好似其他科技股升得咁勁，始終唔係細公司，但以這個估值及前景，安全系數又好似比其他FAAMG高。
圖：FAAMG股價表現
換句話說，微軟的業務股價未必好似一啲科網股等走得咁快，用估值及前景看，跑起上來步伐比較扎實和有後勁。有興趣的話，盯緊微軟Azure的表現，這會是動力引擎。
提提大家，這不是投資推介，投資要自己做功課。筆者並無持有微軟。
(1/2/2021)