早兩年美股暢旺的時候，一眾高增長型股份越升越有，新手入場也容易賺錢，市面上出現好多”股神”，信心十足並不時推介分享投資心得。但時移世易， 2022年投資環境變得艱難，不少”股神”消失了，市場投資熱點又回到大包圍的ETF身上。
呢個趨勢唔係我估，係證券業人士講㗎，《金融時報》早前引述證券行IG的北美行政總裁J.J. Kinahan話，佢哋客戶改咗去投資ETF，不再是個別股票，即係揀市不㨂股。佢仲特別提到大路的ETF，好似係追蹤大市的SPDR標準普爾500 Trust ETF（SPY）、反映科技股表現的Invesco QQQ ETF（QQQ）和追蹤中小企走勢的iShares Russell 2000 ETF（IWM）等多咗捧場客。
2022年的投資環境比較複雜，特別係過去多年做得好的科技股，跌得更慘烈，不少股價暴跌超過一半。而投資的環境亦都變得好快，例如防疫政策放鬆了，經濟回復正常的過程出現有不少的樽頸地帶，令到通脹突然爆升，引發加息步伐越走越快，仲有俄羅斯入侵烏克蘭帶來的地緣政局緊張，打擊了全球的經濟，幾個月的變化真係越數越多。
揀股越來越難
在股市低迷下，揀股越來越難，今日市場熱捧呢類股票，下個月投資又轉調了。如果選擇個別的股份，風險會比較大，所以令到不少投資者都轉移去到投資一些傳統的大型股份身上。而較為大路的選擇，就是揀市不揀股，投資整體美股身上。
圖： QQQ、SPY及IWM三隻ETF一年股價表現
倘若美股市場在上半年見底，下半年氣氛又改善的話，可能會有更多的小股民在回復對市場信心前，都係以ETF做投資取向。
不過值得指出的是，美股近一個月以嚟反彈了差不多一成，市場覺得這輪的反彈不會持久，只是對加息的憂慮有所紓緩，但經濟表現都唔算理想，所以股市仍有不少的不明朗因素，投資時都要審慎一點。
(26/8/2022)