暑假歐美機場人潮洶湧、出現大混亂，對於旅遊人士來講，相信唔會係好消息，不過對於經營旅遊業的公司，可能忙得不亦樂乎，收入源源不絕。呢個星期美國三隻網上旅遊股公布季度業績，睇睇收入係咪咁好。
三隻網上旅遊股中，打頭陣是美國時間星期二收市後公布業績的Airbnb (ABNB) ，星期三有Booking (BKNG)，Expedia (EXPE) 就星期四派成績表。
受到疫情的打擊，航空及旅遊業近幾年都沒有好日子過，不過隨着防疫政策的放寬，各地的經濟都開始回復正常， 2022年暑假旅遊業似乎出現了報復性反彈，大家都急不及待出門旅行，需求急增令旅遊業前景好似出現了曙光。
英航母公司International Airlines Group早前公布業績，亦終於有錢賺， 是疫情肆虐以來的首次。三隻美國上市的旅遊股會否同樣可以有好成績，值是大家期待的消息。
圖： Airbnb、Booking及Expedia 今年以來股價表現
今年甚至係近二、三年以來，旅遊股都一直跑輸大市，表現唔太好，直至近一個月，跟隨大市造好，反彈得唔錯。年初以來標普跌咗一成四，而Expedia做得最差，跌咗四成幾。從好處睇，跌咗咁多，估值都變得吸引。
不過，買股票唔係買過去，係買將來， 究竟今次暑假旅遊業反彈之後，會否有後勁呢？其實呢個也是一個疑問，因為潛伏着的消費力釋放了出來，往後就要看經濟環境如何，而今年上半年通脹升得太厲害， 加息步伐亦都加得太厲害，令到大家的消費力明顯減弱，經濟亦都放慢了，所以明年仲會否有咁多閑錢去旅行？也是一個未知數，所以大家投資的時候，還是審慎一點。