講到美股唔可以唔提美股5大科網巨頭Meta(META) 、蘋果公司(AAPL)、微軟(MSFT)、亞馬遜(AMZN)、Alphabet (GOOGL) ，呢幾間公司佔咗標普指數好大比重，佢地升、大市升，佢地跌大市都唔會好得去邊。不過，這幾隻科技公司在2022年全數都跑輸大市😫。
依家再講FAANG已經out 咗喇，因為Facebook同Google都改晒名，而家大家睇緊MAMAA。
筆者日前文章列出咗20隻大家認識又跌得多的股份，當中這5隻科網巨頭除咗Meta母公司Facebook之外，其他都上榜，原因好簡單，五者當中，較睇淡META。
話說回來美股經歷過2008年以來最差表現的一年，過往表現出眾的熱門、大大隻的股份亦都避唔過跌市，還掉過頭來加大股市的跌勢。
圖：5大科網巨企2022年表現
2022年五隻大型重磅股當中，跌得最傷的就是Meta，跌超過六成，而另一隻重磅股亞馬遜亦都唔好得太多，亦都跌近一半， Google亦都跌近四成，微軟同埋蘋果公司亦都有兩成以上的跌幅，五隻股份都差過整體大市的表現。當中Meta跌到最傷，五年來投資成績在一年內變得煙消雲散，如果閣下五年來持續投資喺Meta的話，好似發了一場夢，仲要蝕錢收場。
亞馬遜
亞馬遜是全球最大的電子商業平台，而近年的賣點是雲端的服務Amazon Web Services (AWS)，歐美國家的通脹升溫，令到經濟增長放緩、消費力減弱，亞馬遜的網上銷售業務亦受到影響。
另一方面2022年不少的科技公司股價跌到四腳朝天，業務發展受經濟環境因素困擾而放緩，亞馬遜的增長動力雲端服務亦受到頗大程度的影響，以致公司表現不似預期，加深股份的沽售壓力。此外大部份地方走出疫情的陰霾，經濟活動開始正常化，減少在家工作的需要，這樣人們亦可以出街購物，亞馬遜網上銷售都會受影響。公司亦都講咗今年全球大裁員一萬八千人嘅行動嚟節省開支。
亞馬遜創辦人Jeff Bezos在2021年七月離開公司，2022年就搞成咁😫，股值縮水近一半又cut人。不過從好處看，股份開始有些吸引力，畢竟這是一隻巨無霸，市場難找到強勁的競爭對手，問題是美國等地的經濟何時可以改善過來。值得一提，好多人繼續睇淡2023年的美國經濟，高息環境不單遏抑通脹，亦都同時打擊了經濟，趁低吸納都要睇時機。
蘋果公司
蘋果的收入主要圍繞旗艦產品iPhone。除咗電子、電腦等硬件外，其他收入如雲端服務、App Store、Apple Music、AppleCare、Apple Pay等等服務，收入都陸續提供唔錯貢獻。跟其他巨企有啲唔同，呢隻係現金牛。
過去多年蘋果公司嘅股價好似越升越有，但2022年環球經濟不景，內地經濟亦都處於低谷，令到一些奢侈品的消費力下降，蘋果公司的銷售亦都自然無可避免受到挫，加上內地的防疫出現混亂的局面，iphone生產供應鍊受到嚴重影響，這還未計半導體的供應緊張，蘋果的產品銷售自然減少，影響了收入。
不過蘋果始終是一間巨無霸、優質的公司，當生產線慢慢重組，生產力恢復過來，加上全球經濟改善過來，長線公司都有望回復動力。2022年股價大跌兩成幾，估值去到合理的水平。
微軟
在MAMAA中，筆者比較喜歡呢隻股份，因為近多年來業務分散有競爭力、有前景，收入都頗穩定，可謂四平八穩，在五大科網巨頭當中，只有蘋果和微軟有息派，而微軟股率較吸引，達1.1%，而蘋果派息只有0.85%。
我都一直希望佢跌多啲可以入貨😂，但在2022年的跌市中，佢跌得比較少，因此現階段吸引力比唔上其他跌得多的大型企業。
微軟的業務分散，業務核心包括：雲端業務(Office產品、Azure等)、遊戲(Xbox等)及電腦設備(Surface等電腦產品)，都有不錯的表現，當中的網上平台Azure是受注目的增長動力之一。
微軟去年打算收購Activision Blizzard (ATVI)，可惜受到聯邦貿易委員會阻止。微軟已經是排名第二的電子遊戲公司，2021年的遊戲收入為163億美元，在電子遊戲市場輸蝕俾最大競爭對手Sony，其中原因是缺乏遊戲獨家產品，今次收購遇上滑鐵盧，都令到不少市場失望。
另方面最新傳聞是公司有意收購Netflix(NFLX)，且看發展如何。順帶一提，Netflix現時所用的雲端儲存都是做用亞馬遜的AWS，一旦真的收購而又成事，雲端市場又有變化。
Alphabet
公司在全球提供多種不同產品及服務，包括廣告Android、Chrome、硬件、Gmail、Google Drive、Google Maps、Google Photos、Google Play 、搜索和YouTube。當中YouTube則為公司的重要收入來源。它的搜索引擎Google佔咗超過九成的網上搜索量和市場份額。
全球經濟增長放緩，所以亦都影響各類商業活動，投放在網上廣告宣傳的開支，亦都大幅削減，這亦都影響Google的整體收入，所以股份無可避免出現重大的調整。
另一方面，市場對於私隱權的要求越來越高，蘋果公司亦都推出的新的私隱政策，令到網上媒體取得個人網上習慣多咗難度，難以推出準確的針對性、個人化廣告，打擊廣告方面的效益。
公司跟網上社交媒體Meta一樣，面對不少的競爭威脅例如TiK ToK，近年大受年輕一輩歡迎，令到網上廣告收入大大分薄了。
不過Google在多方面都比Meta好，至少在搜尋服務是無可取代的。YouTube仍然是最受歡迎的網站。今次Alphabet 出現大調整，股值大縮水，為股份提供吸引力。
Meta
Meta由Facebook改咗名做Meta Platforms之後，表現並沒有起色，早前公佈業績股價瘋狂插水，都嚇走唔少人。依家仍然投資呢隻股票嘅小股民，真的要認真研究一下。
META面對的問題不單是外圍經濟環境差，也是行業問題，以及轉身乏力的問題。另方面，Meta繼續面對歐美政府收緊監管的挑戰，真的屋漏兼逢連夜雨。
公司早期公布的鴻圖大計 “元宇宙”，繼續在燒錢，但又未知幾時成功，成功機會又有幾大，但就對目前財務造成負擔，難怪全球大削過萬名員工。
結語
去年科網巨企收入縮水，估值蒸發了不少，多間公司不約而同相繼作出大裁員，這是多年來少見，反映到未來前景具有相當的挑戰性。在節省成本開支下， 邊際利潤能否提升，以及未來市場經濟動力可否恢復過來，都會影響公司估值一個重要因素，不過如果作為一個長線的部署，我較喜歡Amazon和Alphabet，你哋又點睇？