2022年仲有幾日就完結，睇番今年美國股市出現重大的調整，標普500指數跌近兩成，反映科技股表現嘅納斯達克指數，跌幅更超過30%，可能好多年輕的小股民未經歷咁慘痛嘅境況，喺今年嘅投資環境下，我哋體會到啲乜？
過去10年，美國股市的表現都是升多過跌，可謂大漲小回，近多年來跌得比較多的是2018年，亦只不過是6%，即使投資失利都未致好傷。不過2022年的調整，可謂唔係人咁品，好多科技公司跌到四腳朝天，縮水一半唔出奇，是近13年以來，跌得最深的一年。
圖：美股(標普指數)歷年表現 資料來源：Macrotrends
2022年大贏家：能源股
各類股份當中，只有能源股唔使蝕。當中跌得最多的是奢侈品，以及通訊類股份，跌幅三至四成。
圖：美股(標普指數)各類股份表現(截至27/2/2022)
通訊類行業表現差，其中一個原因是社交媒體及串流媒體表現不濟，好似大大隻嘅Meta(META) 即Facebook母公司，今年跌超過六成，Netflex(NFLX)亦縮水超過一半，拖累到整體行業指數的表現。
2022年做得比較好的股票(冇咁傷)，主要是能源股及防守性比較高的公用股及必需品。油價急升，大大隻的油股水漲船高。
為解美股跌咁多？
美股表現咁差，原因唔使太多解釋，主要受到幾個大問題困擾：
- 俄羅斯入侵烏克蘭做成地緣局勢緊張，能源價格急升，刺激通脹。
- 通脹不受控制，打擊民生、不利經濟。
- 聯儲局收水兼大幅加息，不惜一切代價都要將通脹控制過來。
- 高息環境企業借錢做生意成本大增，影響收入，股價自然縮水。
- 息口升，投機成本加重，好多炒賣活動收斂， 加密貨幣連番爆煲事件，亦都令到唔少人損失慘重。
股神畢菲特有句名言，退潮之後就知道邊個冇着泳衣，今次股市退潮，留低的是什麼的人？閣下有無計下數，今年嘅投資成績又如何。
對筆者來說，今年算是沒有太大動作的一年，唔想留低的股票都賣走咗，留低嘅只好抱住個捱過低潮的心態。以前都經歷過幾次港股大跌市，有咗心理準備，今次只係冇以前咁進取，越跌越買。
今次跌市其實頗全面，大部份人都蝕錢，只是保守嘅或早已增持現金嘅就無蝕咁多。
大跌市話俾大家知：
- 股市唔會長升長有，即使買咗穩健嘅股票，都會跟隨大市調整
- 股市可以跌到你唔信，睇下一啲加加密貨幣，跌咗八、九成，即使增長型股 份一樣勁跌。
- 通脹破壞力可以好大，好多人未經歷過高通脹年代，一時間未必懂得應對及做好防範準備，或者是走避不及。
- 分散投資嘅重要性，增長股過往升好多，好多人為爭取高回報，主力幾隻科技股，或者加密貨幣相關投資，結果身家唔見咗七、八成。
以上的體驗都係老生常談，只是大家未親身經歷過，有咗今次的經驗上咗一堂，往後大家投資相信更懂得如何應對？