近期感覺上比較難介紹股份，有些股票跌得多就有 “專家”出嚟話平，問題就係以現時的市場情況，股市有可能低處未算低，要平的可以更加平。 對於筆者來說，上半年即未來幾個月，投資環境都是宜守不宜攻， 未睇清楚市場形勢前，無謂太勇猛。
香港股市及美股在進入2022年第二季，繼續大幅波動，美國聯儲局的議息會議紀錄告訴大家，聯儲局會不惜一切來遏通脹，出動兩度板斧，第一就是加快加息的步伐，第二就是收水。
加息的影響早前的文章介紹不少，或者會再介紹多一些關於聯儲局收水的影響。
美國通脹越升越高，去到7%以上水平，日常用品加價，能源又加，仲有租金都升，一般來說，打工仔的人工加得最慢，哪有咁幸福可以加薪7%？一年投資有7%回報算好叻。收入無增加，只有靠食老本或節衣縮食來應付，這樣通脹升溫對各行業、各階層有很大的影響。
收入跑贏通脹不容易
面對40年來最熾熱的通脹，美聯儲除了加息，就要縮減市場的閒資，減少市場需求來遏通脹。縮表(縮減資產負債表)方法包括聯儲局唔再買入債券，即唔再借錢出去。另方面，到期的債券(包括有抵押按揭證券)，任由到期並回收資金，唔再投資。這樣市場的流動資金少了，企業、基金等等借錢冇咁易，市場活動慢慢冷靜落嚟，希望可以為通脹降溫。
所以聯儲局議息會議紀錄星期三公開後，進一步確定美國息口和收水步伐會越來越認真，股市又要消化這些不利消息，進一步加劇股市的波動。
下半年投資環境或比上半年好
上半年還有幾個月，可以見到市場的形勢其實都不太好，俄羅斯入侵烏克蘭令到地緣政局緊張， 歐洲多國對俄羅斯實施的經濟制裁，亦都令到天然氣和石油價格急升，通脹想落都難。 加上美國加快了加息和收水的步伐，市場投機的資金減少了，亦都令到從股票賺錢越嚟越艱難。
事實上最近半年，不少的增長型股票都跌到四腳朝天，中小型股份亦冇運行。不少 “專業”推介話好多股份跌到吸引水平，不過市況波動，前景未明，低處可能未算低，市場還需要時間去消化壞消息，股票的合理估值要再調整，如果聯儲局的動作凑效，可以為通脹降溫，這應是下半年，甚至第三、四季的事。所以當前筆者寧願保留實力，放鬆心情去做其他的事吧。
(8/4/2022)