美股長假期後急跌，反映傳統大企業表現的道瓊斯指數打回原形，今年的升幅差不多煙滅了，回報得番個零。不過，跌市原因不是新鮮話題，稍後先同大家研究，今次再講近期的熱話：ChatGPT。
微軟有份投資的AI聊天機器人服務ChatGPT(Chat Generative Pre-trained Transformer)一推出， 可謂一石激起千層浪，引發無限的議論，包括微軟的創辦人Bill Gate在內。Google可謂遇上微軟的正面交峰，兩者當中，你認為邊個會贏？
我會揀微軟🙋♀️，我日後有機會都會買微軟股份。之前一直心大心細，覺得佢之前跌得唔多，未及其他股票吸引，但多了ChatGPT的元素，我覺得多了賣點。
圖： 微軟及Alphabet近5年股價表現
利申一下，我沒有持有Alphabet(Googl)或微軟的股份，不過筆者用緊ChatGPT技術所開發的另一間AI公司服務，比咗訂閱費用(幫趁緊果間小型初創公司，都獲創投基金入股) 。而最近我亦都開咗個ChatGPT戶口，試用緊免費服務，真係好好用。
事實上除了傳統財經內容，資料及軟件的費用，佔我的個人開支不少，Apple Cloud, Amazon AWS, Adobe Cloud, Dropbox, 各類安全軟件等等，全部都俾緊錢，因為現在的我，不再是揸筆搵食，退下火戰唔打長工後，多咗時間接觸不同的技術，由網頁設計、起網站，到整圖剪片，寫旅遊文章到寫財經，統統都做緊，依家算是多媒體人。
今次ChatGPT的出現，唔會係好似5G、元宇宙的炒概念股玩法，其實5G、元宇宙呢啲概念相信依家冇乜人有興趣。
ChatGPT技術一片藍海
講番微軟VS Google，微軟的搜尋器Bing 難與Google匹敵， 不過，微軟入股ChatGPT的開發商OpenAI，就如虎添翼。利用聊天機器人服務可以做好多野，微軟的強項是辦公室作業系統Office，用ChatGPT整合搜尋器Bing 和作業系統Office，可以發輝無限的功能。我只要打兩行字，AI可以幫我整理好開會議程，排列Excel格式，用Words寫信，開會錄音由佢整理紀錄入檔案。
依家用ChatGPT打一封完完整整的信件，如求職信、辭職信等已經無難度。因為網絡世界大把內容可以抄。
這套AI唔係一問一答，佢會記得你之前同佢傾過內容，仲係多國語言。同一個議題可以無限延續。
有人話ChatGPT只是一個抄作熱朝，可能他們沒有真正試用過。不過，過份吹捧，可能會成為泡沫，好似Google早前急於求成，急急介紹AI聊天機械人Bard，未熱身就跣腳，機械人講錯野大出洋相。
不過，在市場學上，筆者算是個Early Adopter，唔好嘅地方是太早入市未必係好事，以前試得太多，一個概念出，早咗 “幾年”入市，所以大家投資時，也可以唔使太急，慢慢來，但ChatGPT這類方向，未來肯定個有顛覆性的影響，應有不少的投資機會。
新科技出，可以創意無限，空間又會超乎想像，微軟贏定Google贏？可能是雙贏都未定，各有強項。不要忘記兩間公司擁有不少不同類型的服務，雲服務、搜尋器、地圖、遊戲，每樣技術跟AI整合之後，可演變新的內容。發展如何拭目以待。
(20/2/2023)