Amazon(AMZN)上星期四公布業績，表現差過預期，股價隨即一直潛水，不過市場並不是一面倒睇得咁淡，部份分析員認為應該趁低吸納。
公司第二季收入上升27%，去到1,131億美元，比市場預期的1,152億美元低，增速亦較去年同期的41%顯著放緩，這張成績表小股東們似乎唔收貨，公司公布業績後股價一直捱沽。多家證券行亦紛紛將公司目標價調低。
Amazon多年來的收入數字，大部份都好過市場預期，今次令市場失望，一來因為市場一直對公司抱有很大的期望。二是疫苗推出令到疫情有所緩和，多咗人走出來行街購買，網購收入表現遜色咗。
公布業績以來，Amazon股價處於弱勢，急跌後反彈乏力，一星期以來逆市下跌6%。情況是否咁差？
Amazon剛剛換咗CEO，的確又面對唔少挑戰，例如監管機構就公司規模及員工的關係，有機會收緊監管，這方面都影響公司的未來發展和盈利收入。講開又講，創辦人Jeff Bezos正式卸任CEO一職，去追尋他的太空夢了，新上任的掌舵人Andy Jassy並不是一個新人，在亞馬遜工作已經有24年，協助成立A W S，並且自2016年以來，擔任CEO的職位，今天AWS已成為公司業務重要的一環。
Amazon似乎仍有不少的捧場客，支持者覺得現階段公司股價出現調整，未嘗唔係一件好事，因為以往公司股價一直上升，令到很多小投資者沒有機會上車，今次公布的收入差過市場預期，但睇番其他數字，如每股盈利都比市場預期好，所以認為現階段可以趁低吸納，又認為公司業務本質未有改變，唔使太驚青。
在最近一季業績中，Amazon 60%收入來自北美的銷售，收入上升22%，國際銷售帶來的收入佔27%，上升了36%，市場一直注視的增長點Amazon Web Services (AWS)，佔公司收入13%，上升37%，整體業績都唔係差，營商環境亦冇變質，對於近期的弱勢未必須要睇得太淡。
利申：筆者沒持有Amazon
(7/8/2021)