受到業績欠佳拖累， Facebook母公司Meta Platforms(FB)股價大插水，短短一個月之內跌咗三成，持有佢股票的股民真的要喊三聲😰。 呢個時候市場上又出現不同的意見，有人認為跌咁多值得趁低吸納，亦都有人覺得唔吸引。
對筆者來說，對這一家公司興趣不大，跌了三成亦都唔算太吸引，原因之一就是基本因素變壞了，有點大勢已去。
Meta 公布2021年第4季的業績，收入上升了20%，乎合市場預期，全年計收入上升了37%，這張成績表面上有所交代。 業績公布當日，股價插水超過兩成，何解股民唔收貨呢？
原因好多相信不少評論都講過，在此只作簡單的概述：
- Facebook 活躍用戶流失嚴重。
- 蘋果公司推新政策，影響Facebook等社交媒體追蹤用戶行為，不利廣告收入。
- 市場競爭激烈，可謂四面受敵，又有Google搶廣告，又有抖音搶客戶。
- 轉型元宇宙，未見成效但就要不斷燒銀紙。
- 各地政府反壟斷措施陸續有來。
今年以來，科技公司股價明顯出現調整，而大型科技股中，Meta表現是最差的，年初以來已經下跌三成。
圖：FAAMG股價表現 (11/2/2022)
想執平貨的都有另外一個論調，就是如果大家相信主席朱克伯格，以及他的元宇宙藍圖，便會有一番的憧憬，加上公司旗下產品仍是難以取代，所以股價大大跌，造就趁低吸納的良機。
以基礎分析， 這間公司的估值相對其他的巨企是最低的，但這是否特別吸引力呢？對筆者來說，如果公司盈利增長去到頂峰，與此同時新增業務前景得個講字，仲要應付龐大開支，其實吸引力會大為減少。加上不少科技公司亦都因為在加息陰影下，股價跌到四腳朝天，估值亦都相對吸引，換言之要執平貨，市場上選擇其實不少。
(15/2/2022)