美股昨天大幅波動，但一隻去年跌得好痛的電子商貿公司Shopify(SHOP)則逆流而上，一天內大幅反彈一成，原因是公司宣布加價。
Shopify主要業務是為企業提供一個買賣平台，你可以隨時去訂購它的服務，開一間網店，由起網站到落單、收錢，可以透過它的服務輕鬆搞晒。由於Shopify已經佔有龐大市場，暫時仍難找到強勁的競爭對手，加價可以帶來額外收入，所以對市場來說是利好的消息。
筆者早前列出20隻去年跌得多而大家認識的股份，當中9成至今反彈幅度多過標普指數，特別係Coinbase(COIN)及Shopify(SHOP)，無它因為這兩隻去年跌得最傷，在低基數下反彈幅度再大，有排才返家鄉，不幸地我兩隻都持有😂。
Shopify VS Amazon
上次講咗Coinbase， 今次討論一下Shopify，好多人時常把Shopify 跟Amazon做比較。 兩者都經營網上平台，Amazon好似一個大型百貨公司，裡面有唔同商號。Shopfiy則似一個商場，為唔同嘅企業提供基本的設施，幫公司開設及經營網店。
兩間公司都是在電子商貿上打破傳統，對銷售行業有顛覆性的影響。過去多年大家都高速咁發展，加上早兩年受到疫情影響，好多人都冇得出街購物，網上銷售大行其實，股價亦好似坐火箭咁升上太空。直至去年情況逆轉了，股價齊齊插水，Amazon股價跌近一半，而Shopify則跌咗七成。
當然論規模，Shopify有排先追得上，但好多人就睇好細細地，似係Amazon二號，發展仍然有好大空間。
圖： Shopify與Amzon比較
通脹升溫，加上息口不斷上升，人工又追唔上，唔少人都要節衣縮食，非必需的消費品大受打擊，網上銷售都縮咗水。連Amazon都要全球大裁員。所以大家對Shopify前景都唔睇得太好。
筆者一真持有Shopify，對佢嘅業務前景仍未死心，它在全球有擁有二百多萬嘅企業客戶，市場上好難找到強勁的競爭對手。當全球經濟從谷底回升，業務亦可望重回軌道，不過無人說得準歐美經濟幾時復甦，不少分析員估最快都要今年尾或明又才會有好轉。
值得一提的是Amzon最近在美國推出一個新計劃 “Buy with Prime”， 容許商戶利用Amazon的支付系統以及送貨服務。市場關注會否搶走 Shopify的業務，呢個就要拭目以待。
(26/1/2023)