講到Tesla(TSLA)，好多人當佢係科技股多過汽車股。2022年美國科技股跌到四腳朝天，Tesla也是其中一員。一隻咁大隻的藍籌股急挫逾六成，應該都唔少人損失慘重。 調整到呢個水平，大家覺得吸引未呢？
圖片來源：公司網站
呢隻股份好似佢佬細Elon Musk一樣，走勢都好難捉摸。公司股價急挫，佢仲係Twitter搞到一頭煙，網民表決唔歡迎佢領導這個社交媒體。
話說回來，一直以來，在電動汽車佔有最大市場的Tesla，憑著設計及科技創新，顛覆了整個汽車市場， 股價年年上升，大大隻的股票都可以一年之間急升逾倍，股價升到上太空，不過，去年開始重返地球，潛入深海。
內地大幅削價促銷保銷量
去年Tesla股價縮水了三分之二，是一眾科技大藍籌中表現最差的一隻。跌幅仲多過其的汽車股。公司近期注目的新聞相信係Tesla在中國減價再大減價。Model 3 起售價從 26.59 萬元人民幣減至 22.99 萬元，Model Y 售價從 28.89 萬元起，降至 25.99 萬元，比美國市場仲要平，搞到內地的車主要『維權』。
圖：Tesla近5年股價走勢
以前顧客買車，閒閒地要等三個月，依家可以即時有貨，公司仲頻頻降價促銷，反映Tesla銷售唔係太好景，要大平賣來保住市場。事實上在高通脹、經濟低迷下，生產成本上升但銷路下降成為汽車業面對的問題。
為保住市場佔有率，Tesla不斷將產量目標大幅提升，2023年公司目標生產2百萬輛汽車，比2022年的一百四十萬提高超過四成。市場擔心將產量谷大，最終迫住要再減價來促銷。
圖：Tesla表現與競爭對手比較(截至 13/1/2023)
不過，Tesla的優勢是在電動車市場中，品牌享有的地位難以取代，公司控制成本了得，邊際利潤又高，跑贏競爭對手幾條街，公司有減價的條件，即使之前大幅削價，利潤仍高過對手。事實上，在電動汽車市場裡面，唔係好多公司從中賺到錢。
另一個好友的看法是，即使汽實銷售不似預期，但公司另一個賣點是它的再新能源及電池儲存業務，呢個部份發展得唔錯，非汽車業務在2021年度提供了120億美元的收入。
過去一年Tesla股價出現了重大的調整，去到一年多前水平，開始又吸引唔少散戶，蠢蠢欲動想等佢跌穿每股100美元入市撈底。問題是Tesla未來仍面對不少問題，一來股價多年來好似越升越有，大家當科技股炒，估值升上天花板。二來，今年投資的主題，有機會從加息、高通脹轉到經濟衰退方面，經濟不景奢侈品銷售自然唔會好，可以預期股價繼續大幅波動難免。
(16/1/2023)